ENTREVISTA INACIU GALÁN

 INACIU GALÁN

Ye un arguyu que la primer entrevista pueda realizarla al gran Inaciu Galán.

“Nun hai que tener mieu, van cuntar col nuesu sofitu y han recordar que los casos de discriminación que nun se denuncien, que nun se faen públicos, queden impunes de xuru y enriba nun valen pa nada, nun ayuden a dar visibilidá al conflictu llingüísticu y a la falta de drechos civiles que vivimos n’Asturies los falantes d’asturianu”

P- Bones Inaciu, antes de nada agradézote qu’aceptares esta entrevista. Amás d’activista pola llingua de toos ye sabío que yes presentador de televisión y dirixes una revista lliteraria. ¿Cuál de las tres actividaes ye la que te da más dolores de cabeza?

R- Bono, la verdá ye que tengo la suerte de trabayar en coses que me presten, anque toes elles dan dolores de cabeza de xemes en cuando (rises). Participar del trabayu activisa pol idioma con Iniciativa pol Asturianu ye lo más apasionante pero ye verdá que tamién vives esmolecíu pola situación de la llingua asturiana, polos ataques que recibe, por nun ser quien a facer tolo qu’unu querría…  Ye un llabor que lleva munchu tiempu pero que tamién, cuando consigues dar pasos alantrs, movilizar a nuevos socios… presta pola vida.

P- Como presentador de Territoriu Sidreru de la TPA visitasti numberosos llagares y festivales, cúntanos dalguna anécdota curiosa que te pasara.

R- Bono, facer Territoriu Sidreru foi unu de los proyectos de televisión que más me prestaron. Anque la idea inicial tenía un aspectu más de documental y dempués hebo metese dalguna seición que me prestaba menos, consiguimor caltener un cuerpu del programa que fuera difusor, per primer vegada na televisión, de la importante cultura sidrera que vivimos n’Asturies. Nun conozo nenguna otra cultura onde una bebida seya tan protagonista y esencial. Una de les anécdotes de la grabación ye que mos tocaba llegar a los llagares bien ceo, sobre les ocho la mañana y nun yera raro llegar y a los pocos minutos tener que beber cuatro o cinco culinos, ente los que te daba’l llagareru y les tomes que se repitíen. Yera un almuerzu un pocoñín fuerte (rises).

P- ¿Qué ye lo meyor y lo peor de trabayar en televisión?

R- Lo peor ye formar parte d’una televisión, la TPA, que nun tien un proyectu p’Asturies nin una idea de pa qué tien de servir una televisión nun territoriu que tien una llingua en peligru y con necesidá d’espacios de prestixu. Lo meyor, convertir los espacios nos que trabayé en ventanes a la normalidá del idioma pal telespectador asturianu, demostrar que facer televisión n’asturianu non solo ye posible, sinón qu’a la xente-y presta.

P-¿Cómo surdió la idea de crear una revista como Formientu?

R- Bono, pues va facer cuasi diez años que como escritor mozu que yera, y creo que sigo siendo (rises) y xunto a Benxa Pérez, otru rapaz qu’escribe n’asturianu, pensemos que yera necesario buscar un espaciu específicu que-y diera visibilidá y un espaciu nel que formase frente al públicu, a una nueva xeneración d’autores que taba surdiendo. Consiguimos presentar a munchos autores mozos que güei tán consagraos y xenerar actividá alredor de la lliteratura moza na nuesa llingua.

P-¿Consideres que, como director d’una revista lliteraria n’asturianu, hai futuru nel mundu de la novela, poesía, etc. na nuesa llingua?

R- Agora vamos camín del númberu catorce de Formientu y llevamos espublizando la obra n’asturianu de más de 90 autores menores de trenta años, tocando cásique tolos xéneros. Ye un milagru que cola probe presencia del idioma nes escueles d’Asturies, güei podamos falar d’un númberu tan altu d’escritores mozos. Hai futuru y muncho.

P-¿Qué-yos diríes a esos nuevos escritores asturianos que nun s’atreven a escribir n’asturianu por mieu a nun vender o a nun ser lleíos?.

R- Nun sé si dan esos casos. Más que nada, porque los autores asturianos en castellán tampoco ye que viendan más que los d’asturianu. Esiste un sistema lliterariu basáu nos best sellers y nes grandes editoriales internacionales y publicar n’Asturies nun se fai a día de güei por cuestiones económiques. Lo que más m’esmolez nun son los escritores que deciden nun escribir n’asturianu, sinón toos y toes aquellos mozos que salen del sistema educativu asturianu ensin la posibilidá de decidir si escriben o nun escriben n’asturianu, si falen o nun falen n’asturianu nes situaciones que-yos peten, porque nun los formaron pa tener un nivel correctu d’usu del idioma. Esi ye un problema gordu y tócanos trabayar, lluchar, pa camudalu, precisamos un sistema educativu asturianu onde l’asturianu tenga una presencia normal como llingua vehicular.

P-¿Cuándo y por qué nació Iniciativa pol Asturianu?

R- Pues ñaz en 2011 d’un grupu de persones que fuimos averándonos con un interés común, esplorar nueves formes de facer reivindicación llingüística adaptaes a los nuevos tiempos que yá se víen venir, complementar el llabor d’otres organizaciones que taben yá trabayando y sobre manera implicar a la sociedá, salir d’un ciertu aisllacionismu del asturianismu p’averanos a otros colectivos, empreses y persones que simpaticen cola causa del asturianu pero a les que nun se foi quien a movilizar. Y nun ye fácil, siguimos trabayando pa consiguilo.

P-Toos sabemos que nuesa llingua sufrió, y sigue sufriendo, un acosu y valtamientu per parte de les instituciones. ¿En dalguna ocasión recibistis presiones o dalgún tipu d’impedimentu a la hora de realizar dalgún actu por daquién o dalguna institución?

R- Tuvimos dalgún casu, como cuando’l Conceyu d’Uviéu quería neganos la posibilidá d’usar l’asturianu pa solicitar un espaciu na cai. Consiguimos que se camudara la normativa nel plenu de la capital asturiana. A los conflictos buscámos-yos soluciones. Sicasí, ye verdá, qu’acciones bien importantes, como la nuesa presencia nes Naciones Xuníes, que sí cubrió inclusive TVE, nun salió nunca na TPA, por poner un exemplu recién d’un actu bien importante. El día que tábemos en Xinebra esplicando la llaceriosa situación de la llingua asturiana, TPA abría la estaya de cultura del telediariu falando d’una playa de Galicia que taba mui llena de xente… Eses torgues impiden que’l mensaxe llegue a más xente.

P-Nos años que lleves como dirixente d’Iniciativa pol Asturianu, ¿recibistis quexes de la ciudadanía en temes como discriminación llingüística?

R- Por supuestu, recíbense cada selmana. Madres y padres que nun pueden escolarizar a los fíos nin siquier na asignatura d’asturianu, xente que tien problemes pa usar l’asturianu cola aliministración… Sicasí, la xente tovía tien poca conciencia de la necesidá de resistir y denunciar los casos. Nun hai que tener mieu, van cuntar col nuesu sofitu y han recordar que los casos de discriminación que nun se denuncien, que nun se faen públicos, queden impunes de xuru y enriba nun valen pa nada, nun ayuden a dar visibilidá al conflictu llingüísticu y a la falta de drechos civiles que vivimos n’Asturies los falantes d’asturianu.

P-Va un par de meses tuvistis en Xinebra participando nel Altu Comisionado de Drechos Humanos la Organización de les Naciones Xuníes, ¿cuáles fueron les tos impresiones tres la vuesa comparecencia, paezte que dende la Xunta Xeneral d’Asturies van trabayar pa la normalización y la oficialidá de la llingua?

R- La impresión ye que’l Gobiernu d’España nun quier saber nada del asturianu, como’l Gobiernu d’Asturies o peor. Lo bono, que podemos entamar acciones internacionales pa defender a los asturfalantes de los incumplimientos de drechos humanos llingüísticos que se dan n’Asturies y que reconoz la ONX. De la nueva Xunta Xeneral, la que tien más diputaos en partíos que lleven la oficialidá del programa en tola hestoria, esperamos muncho. Esi compromisu tresversal, que comparten Podemos, Izquierda Xunida y Foru, ha sirvir pa que se dean pasos importantes y lo más rápido posible.

P-Tres el nomamientu d’un miembru de l’Academia de la Llingua Asturianacomo conseyeru d’educación y cultura, ¿crees que se trabayara agora con intensidá y con ganes pola defensa de la llingua o quiciabes seya un miembru más del Gobienru que nun ve la llingua como daqué importante?

R- Paezme qu’esa entruga hai que-yla facer a él. Nós tenemos bones espectatives alredor de los sos deseos de facer. Sicasí, hai exemplos de xente con trayectoria intachable en defensa del asturianu qu’al llegar a cargos públicos nun tuvieron al altor de les circunstancies, polo que nun ta asegurao nada. Va cuntar con tol sofitu pa dar pasos alantres, pero nun va tener un solu créitu más que cualquier otru responsable políticu. Si lo que quier el gobiernu de Javier Fernández ye poner nel cargu a un asturianista pa que nun se faiga nada y callemos porque ye “de los nuesos”, nun va funciona-y. Esperamos que’l deséu seya otru, camudar la direición, pero cuesta creelo.

P-¿Consideres como presentador de la TPA que la llingua ta daqué escaecida na mesma televisión d’Asturies?

R- Agora mesmo, y dende que terminé col proyectu de Territoriu Sidreru, nun trabayo en nengún proyectu pa la TPA, anque sí collaboro en dalgún programa de la RPA. En xeneral la radiotelevisión pública asturiana ye un proyectu que nun tien sentíu tal y como ye güei. Ha convertise nuna ferramienta pa vertebrar Asturies, pa reforzar la identidá de los asturianos, pa danos a conocer Asturies y pa normalizar la llingua asturiana con productos de calidá y con espacios de prestixu pal idioma: informativos, doblaxe de películes, programación infantil, deportes…

P-Agora conozamos un pocu más a Inaciu. ¿Qué tipu de música aveces a escuchar o que grupu ye’l to favoritu?

R- Préstame sentir música en llingües cercanes a la de nueso, amás de n’asturianu. Soi de gustos venceyaos al pop, a la música pa sentir con tranquilidá. D’ente los artistes asturianos quédome con Toli Morilla, Silvia Quesada… Sicasí, soi de gustos mui varios. Más que gustame artistes, suelen gustame cantares sueltos: una de Dixebra, una d’Alfredo González, cantares de Pop Piquiñín (rises), temes d’Anabel Santiago, Mariluz Cristobal Caunedo…

P-¿Sporting o Uviéu? Siendo de Xixón creo que ta bien claro, pero quién sabe…

R- Garrástime. Nun soi nada futboleru. Soi unu d’esos raros que nun ve nunca un partíu de fútbol. Nun me siento del Sporting nin del Uviéu, anque m’allegro cuando ganen, porque gana Asturies y entiendo que pa muncha xente ye un elementu d’ilusión. Nun me gusten les lluches llocalistes que se xeneren, cuando van más allá del humor sanu, ente Uviéu y Xixón. Amás, el fútbol profesional, y anque valoro dellos aspeutos positivos tamién, ta chiscáu de coses que nun me presten: demasiaos intereses económicos, violencia nos campos, nula presencia de los equipos femeninos… Por eso me presten proyectos deportivos y sociales como’l que representa un club como’l Ciares de Xixón, que tien unes implicaciones tan positives y una manera distinta de ser un equipu, otros valores.

P-Si tuvieres qu’escoyer una película, ¿cuál sería?

R- Meca, pónesmelo difícil. Gústenme tantes películes que cada añu faise más difícil responder a esta entruga. Hai una, una comedia dramática de Jack Nicholson, As Good As It Gets (Mejor imposible, en castellán) que ta un poco na mio tiesta como una película que siempres encamiento y qu’aprovecho pa ver siempres que surde la oportunidá. Pero hai tantes bones películes y tantes venceyaes a momentos concretos de la vida d’unu, que ye mui difícil llendar la escoyeta a una namás.

Bono, quiero agradecerte de nuevo qu’aceptares la entrevista, amás de que m’arguyez que la primer entrevista seya a ti y sobre manera agradecete a ti y a los collacios d’Iniciativa pol Asturianu tol vuesu labor pol asturianu. Dende esti pequeñu blogue tenéis a un collaciu más pa lo que seya.

Gracies a ti por echar un gabitu a difundir la llingua asturiana y la so situación y por esos cantares n’asturianu que vas asoleyando. Tamién puedes cuntar con nós pa lo que podamos agabitar.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s